મોરબી: ટેમ્પરરી રજીસ્ટ્રેશનની ફી ની તફાવતની રકમ એનઆઇસી દ્વારા પરિવહન પોર્ટલ પર ઓનલાઈન ભરી શકાશે

રાજ્યમાં છેલ્લા અઢી વર્ષમાં ખરીદી કરવામાં આવેલ વાહનો બ્લેક લિસ્ટ કર્યાના સમાચાર કેટલાક વર્તમાન પત્રો દ્વારા છાપવામાં આવી રહેલા છે. આ બાબતે હકીકત એવી છે કે, વર્ષ એપ્રિલ-૨૦૨૧માં સેન્ટ્રલ મોટર વ્હીકલ રૂલ્સ-૧૯૮૯ માં થયેલ ટેમ્પરરી રજીસ્ટ્રેશનની ફી નો સુધારો એનઆઇસી દ્વારા પરિવહન પોર્ટલમાં અમલીકરણ કરવામાં આવેલ ન હતું. હકીકતે પરિવહન પોર્ટલમાં વાહનો બ્લેકલિસ્ટ કરવામાં આવેલ નથી.

રાજ્યમાં તા. ૧-૪-૨૦૨૧ થી ૨૪-૫-૨૦૨૩ સુધી નોંધાયેલ વાહનોને સેવા મેળવતા પૂર્વે લોક લગાવવામાં આવેલ છે. વાહન માલિક તફાવતની રકમ ભરપાઈ કરી શકે તે હેતુથી એનઆઇસી દ્વારા પરિવહન પોર્ટલમાં ઓનલાઈન પેમેન્ટની સુવિધા ઉપલબ્ધ કરવામાં આવેલ છે. આ વાહનોમાં જ્યારે વાહન માલિક તેઓના વાહન સંબંધિત કોઈ પણ સેવા મેળવવા માંગતા હોય તે સમયે પોર્ટલ પર તેઓને તફાવતની રકમ ભરપાઈ કરવા હેતુ મેસેજ ડિસ્પ્લે કરવામાં આવે છે. જેમાં આ રકમ ઓનલાઈન કઈ રીતે ભરપાઈ થઈ શકે તેનો સંપૂર્ણ ફલો પણ સામેલ છે તથા તફાવતની ભરતી કરવા પાત્ર રકમ પણ આપમેળે પોર્ટલમાં ડિસ્પ્લે થઈ જાય છે અને વાહન માલિક પરિવહન પોર્ટલ પર VAHAN services>>tax/fee services>> Audit Recovery Fee ઉપર જઈ તફાવતની ફી ઓનલાઈન ભરી શકે છે અને ભરપાઈ થાય તે તુરંત પોર્ટલ દ્વારા આપમેળે વાહન પર મૂકવામાં આવેલ લોક હટાવી લેવામાં આવે છે. આ માટે અરજદારે આરટીઓ કચેરીની મુલાકાત લેવાની પણ જરૂર રહેતી નથી તેવું મોરબી સહાયક પ્રાદેશિક વાહન વ્યવહાર અધિકારીની યાદીમાં જણાવાયું છે.