મોરબી નજીક રોડ ક્રોસ કરતાં સમયે ટ્રકના વ્હીલ કમર ઉપર ફરી જતાં યુવાનનું મોત

મોરબીના જૂના રફાળેશ્વર રોડ ઉપર આવેલ જાંબુડીયા ગામની સીમમાં પેપરમીલ પાસેથી યુવાન રોડ ક્રોસ કરી રહ્યો હતો ત્યારે ટ્રક ચાલકે તેને હડફેટે લીધો હતો અને ટ્રકના તોતિંગ વ્હીલ તેના શરીર ઉપર કમરના ભાગે ફરી વળતા તે યુવાનનું મોત નિપજ્યું હતું અને અકસ્માત સર્જીને ટ્રક ચાલક પોતાનું વાહન લઈને નાસી ગયો હતો જેથી હાલમાં મૃતક યુવાનના કાકા દ્વારા મોરબી તાલુકા પોલીસ સ્ટેશન ખાતે ટ્રક ચાલકની સામે ફરિયાદ નોંધાવવામાં આવતા પોલીસે ગુનો નોંધી આરોપીને પકડવા માટે તજવીજ શરૂ કરી છે

બનાવની જાણવા મળતી માહિતી મુજબ મોરબીના રવાપર ગામ પાસે આવેલ બોની પાર્કમાં સિલ્વર હાઈટ ફ્લેટ નં-૪૦૨ માં રહેતા મનીષભાઈ નથુભાઈ કાવર જાતે પટેલ (૩૮)એ હાલમાં મોરબી તાલુકા પોલીસ સ્ટેશન ખાતે ટ્રક નંબર જીજે ૧૨ એટી ૬૬૫૮ ના ચાલક સામે ફરિયાદ નોંધાવી છે જેમાં તેને જણાવ્યુ છે કે, મોરબીના જુના રફાળેશ્વર રોડ ઉપર જાંબુડીયા ગામની સીમમાં આવેલ મિલેનિયમ પેપર મીલ પાસે આરસીસી રોડ ઉપરથી તેનો ભત્રીજો ખોડીદાસ વિનોદભાઈ કાવર (૨૧) નામનો યુવાન રોડ ક્રોસ કરી રહ્યો હતો તે વખતે ટ્રક ચાલકે બેફિકરાઈથી પોતાનું વાહન ચલાવ્યું હતું અને યુવાનને હડફેટે લીધો હતો અને તે યુવાનના શરીર ઉપર કમરના ભાગેથી ટ્રકના વ્હીલ ફરી જતા તે યુવાને ગંભીર ઇજા થઈ હોવાથી તેનું મોત નીપજયું હતું અને અકસ્માત સર્જીને ટ્રક ચાલક પોતાનું વાહન લઈને સ્થળ ઉપરથી નાસી ગયો હતો જેથી કરીને હાલમાં ભોગ બનેલા યુવાનના કાકા દ્વારા મોરબી તાલુકા પોલીસ સ્ટેશન ખાતે ટ્રક ચાલકની સામે ફરિયાદ નોંધાવવામાં આવતા પોલીસે ગુનો નોંધી આગળની રાબેતા મુજબની કાર્યવાહી કરેલ છે વધુમાં ફરિયાદ પાસેથી મળી રહેલ માહિતી મુજબ તેનો ભત્રીજો ઘરેથી ક્રિકેટ રમાવ જવાનું કહીને નીકળ્યો હતો અને ત્યાર બાદ તેનું મિલેનિયમ પેપર મીલ પાસે ટ્રક ચાલકે હડફેટે લેતા મોત નીપજયું હતું