ટંકારા નજીક રિક્ષા-બાઇક વચ્ચે અકસ્માત: રિક્ષા ચાલકના પિતાનું મોત

ટંકારા નજીક રીક્ષા અને બાઈક વચ્ચે અકસ્માત સર્જાયો હતો જેમાં બાઇક ચાલકને ઇજાઓ થઇ હતી અને રીક્ષામાં બેઠેલા રિક્ષાચાલકના પિતાને ગંભીર ઇજાઓ થઇ હોવાથી તેનો સારવાર દરમિયાન મોત નીપજયું હતું જેથી હાલમાં બાઈક ચાલકે રિક્ષાચાલકની સામે ફરીયાદ નોંધાવતા પોલીસે ગુનો નોંધી આગળની રાબેતા મુજબની કાર્યવાહી હાથ ધરી છે

બનાવની જાણવા મળતી વિગતો પ્રમાણે મૂળ ધ્રોલિયાના રહેવાસી અને હાલમાં મીતાણા ગામે પ્રેમજીભાઈના મકાનમાં ભાડે રહેતા કિશોરભાઈ હમીરભાઇ ચૌહાણ (ઉંમર ૨૭) એ રીક્ષા નંબર જીજે ૩૬ યુ ૭૬૯૦ ના ચાલક અરવિંદભાઈ ધીરુભાઈ ઉઘરેજા રહે. ટંકારા વાળાની સામે ફરિયાદ નોંધાવી છે જેમાં તેણે જણાવ્યું છે કે, તે ટંકારા રાજકોટ હાઇવે ઉપર પ્રભુભાઈના ફાર્મ હાઉસ સામેથી પોતે પોતાનું બાઇક નંબર જીજે ૩૬ એ ૭૧૩૮ લઇને પસાર થતો હતો ત્યારે રિક્ષાચાલકે તેની રીક્ષા જોયા વગર રોડ ક્રોસ કરતા બાઈકને હડફેટે લીધું હતું જેથી કરીને ફરિયાદી કિશોરભાઇ ચૌહાણને પગમાં અને કપાળે ઈજા થઈ હતી અને રીક્ષામાં બેઠેલા રિક્ષાચાલક અરવિંદભાઈના પિતા ધીરુભાઈ કાળુભાઈ ઉઘરેજાને શરીરે ઇજાઓ થઇ હોવાથી તેને સારવાર માટે ખસેડાયા હતા સારવાર દરમિયાન ધીરુભાઈ ઉઘરેજાનુ મૃત્યુ નીપજયું હતું જેથી કરીને હાલમાં બાઇક ચાલકની ફરિયાદ લઈને પોલીસે રિક્ષા ચાલકની સામે ગુનો નોંધી આગળની કાર્યવાહી હાથ ધરેલ છે

દેશીદારૂ

વાંકાનેર મોરબી રોડ ઉપર આવેલ એ.કે. હોટેલ સામેથી પસાર થતી બોલેરો ગાડી નંબર જીજે ૩૬ ટી ૭૮૪૧ ને પોલીસ ચેક કરતા તેમાંથી ૮૦૦ લિટર દેશી દારૂ મળી આવ્યો હતો જેથી કરીને ૧૬૦૦૦ રૂપિયાનો દારૂ અને ગાડી આમ કુલ મળીને ૩૧૬૦૦૦ રૂપિયાના મુદ્દામાલ પોલીસે કબ્જે કર્યો છે જોકે બોલેરો પીકપ વાહનનો ચાલક નાસી ગયો હોય તેને પકડવા માટે પોલીસે તજવીજ શરૂ કરી છે