મોરબીમાં B.A.M.S. DRS એસો. અને વૈદ્યસભા દ્વારા શરદોત્સવ-2026નું આયોજન

શરદ પૂર્ણિમાના પાવન પર્વને ઉત્સાહ અને ઉમંગ સાથે ઉજવવા માટે મોરબી B.A.M.S. DRS એસો. તથા મોરબી વૈદ્યસભાના સંયુક્ત ઉપક્રમે ‘શરદોત્સવ-2026’ રાસ-ગરબા મહોત્સવનું ભવ્ય આયોજન કરવામાં આવ્યું છે. તબીબી ક્ષેત્ર સાથે સંકળાયેલા ડોક્ટરો તથા તેમના પરિવારજનો માટે આયોજિત આ રંગારંગ કાર્યક્રમમાં રાસ-ગરબાની રમઝટ સાથે સ્નેહમિલનનો અનોખો માહોલ સર્જાશે.

શરદ પૂર્ણિમાની પાવન રાત્રિએ યોજાનારા આ મહોત્સવમાં રાસ-ગરબાના રંગે રંગાવા અને સ્નેહ મિલન સહમિલનનો આનંદ માણવા માટે ડોક્ટરો તથા તેમના પરિવારજનોને આયોજકો દ્વારા હાર્દિક આમંત્રણ પાઠવવામાં આવ્યું છે. આ કાર્યક્રમ તા. 24 ઓક્ટોબર, 2026ને શનિવારના રોજ સાંજે 6:30થી 12:30 કલાક સુધી મોરબી-રાજકોટ હાઈવે પર આવેલા OSEM CBSE School, શનાળા ખાતે યોજાશે અને ત્યારે સંગીતના તાલે રાસ-ગરબાની રમઝટ સૌ સાથે મળીને બોલાવશે. ખાસ કરીને આ શરદોત્સવમાં પરંપરાગત ભારતીય વેશભૂષાને પ્રાધાન્ય આપવામાં આવ્યું છે. જેમાં પુરુષોએ કેડિયું, કુરતો, ધોતી-કેડિયું, બંડી, જાકેટ સહિતની પરંપરાગત વસ્ત્રો અને મહિલાઓએ ચણિયા-ચોળી, કેડિયું, સાડી, લેહેંગા તેમજ અન્ય રંગબેરંગી ભારતીય પરિધાન પહેરવા માટે આયોજકો દ્વારા અપીલ કરવામાં આવી છે. આ રાસ-ગરબામાં પરંપરાગત ભારતીય વેશભૂષાને પ્રાધાન્ય આપવામાં આવ્યું હોવાથી ગુજરાતની લોકસંસ્કૃતિ અને ભારતીય પરંપરાની અનોખી ઝલક કાર્યક્રમમાં જોવા મળશે. આ કાર્યક્રમમાં બંને સંસ્થાઓની સાથે જોડાયેલ ડોક્ટરો તેમના પરિવારજનો અને આમંત્રિત મહેમાનો ઉપસ્થિત રહે તેના માટે સંસ્થાના પ્રમુખ સહિતની ટીમે અનુરોધ કર્યો છે.