મોરબીના મહેન્દ્રનગર ગામ પાસે ટ્રક ચાલકે ડબલ સવારી એક્ટિવાને હડફેટે લેતા બે પૈકીનાં એક વૃદ્ધનું મોત

મોરબીના મહેન્દ્રનગર ગામ પાસે આવેલ આઈટીઆઈ નજીકથી ડબલ સવારી એક્ટિવામાં બે વૃદ્ધ સાઢુ ભાઈ પસાર થઈ રહ્યા હતા ત્યારે ટ્રક ચાલકે તેઓના એક્ટિવાને હડફેટે લેતા અકસ્માતનો બનાવ બન્યો હતો અને એકટીવા ઉપર જઈ રહેલા બંને વૃદ્ધને ઇજાઓ થઈ હતી જે પૈકીના એક વૃદ્ધનું મોત નીપજયું હતું જે બનાવ સંદર્ભે હાલમાં ઈજાગ્રસ્ત વૃદ્ધની ફરિયાદ લઈને પોલીસે ટ્રક ચાલક સામે ગુનો નોંધીને આરોપીને પકડવા માટે તજવીજ શરૂ કરેલ છે 

મોરબીના ઘૂટું ગામે સરકારી હાઈસ્કૂલની પાછળના ભાગમાં રહેતા દેવજીભાઈ હરખજીભાઈ સનારીયા (72)એ ટ્રક નંબર આરજે 1 જીડી 2577 ના ચાલક સામે મોરબી તાલુકા પોલીસ સ્ટેશન ખાતે ફરિયાદ નોંધાવેલ છે જેમાં જણાવ્યું છે કે તેઓ પોતાના સાઢુભાઈ નરભેરામભાઇ નાગજીભાઈ સનારીયા (83) રહે. ઘુટુ વાળાના એક્ટિવા નંબર જીજે 3 ડીબી 2585 માં પાછળ બેસીને જઈ રહ્યા હતા ત્યારે ટ્રક ચાલકે પાછળથી એકટીવાને ઠોકર મારી હતી જેથી અકસ્માતનો બનાવ બન્યો હતો અને એકટીવા ઉપર જઈ રહેલા ફરિયાદી તથા તેના સાઢુ ભાઈ રસ્તા ઉપર નીચે પટકાયા હતા ત્યારે ટ્રકનું ટાયર ફરિયાદીના સાઢુભાઈ નરભેરામભાઇના પગ ઉપરથી ફરી જવાના કારણે ગંભીર ઇજા થવાથી તેઓનુ મોત નીપજયું હતું જ્યારે પાછળ બેઠેલા ફરિયાદીને બંને પગમાં ફ્રેક્ચર જેવી ઇજા થયેલ હોય તેને સારવાર માટે હોસ્પિટલે લઈ ગયા હતા અને આ બનાવ સંદર્ભે ઈજા પામેલ વૃદ્ધે સારવાર લીધા બાદ નોંધાવેલ ફરિયાદ આધારે પોલીસે ગુનો નોંધી આરોપીને પકડવા માટે તજવીજ શરૂ કરેલ છે