ટંકારાના ઓટાળા ગામ નજીક ઇકો ગાડીને ચાલકે બે બાઇકને ઉડાવ્યા: ઇજાગ્રસ્તો સારવારમાં

ટંકારા તાલુકાના ઓટાળા ગામ નજીક આવેલ ગોકુલ કારખાનાની સામેના ભાગમાં ઇકો ગાડીના ચાલકે બે બાઇકને હડફેટે લીધા હતા જેથી ઈજા પામેલા બે વ્યક્તિઓને સારવાર માટે હોસ્પિટલે લઈ ગયા હતા અને આ બનાવ સંદર્ભે હાલમાં ઇકો ગાડીના ચાલક સામે ટંકારા તાલુકા પોલીસ સ્ટેશન ખાતે ફરિયાદ નોંધાતા પોલીસે ગુનો નોંધી આરોપીને પકડવા માટે તજવીજ શરૂ કરેલ છે 

ધ્રોલ તાલુકાના લતીપર ગામે રહેતા અને મજૂરી કામ કરતા જયસુખભાઈ કાબાભાઈ ડાભીએ હાલમાં ઇકો ગાડી નંબર જીજે 36 એસી 5879 ના ચાલક સામે ટંકારા તાલુકા પોલીસ સ્ટેશન ખાતે ફરિયાદ નોંધાવેલ છે જેમાં જણાવ્યુ છે કે, ટંકારા તાલુકાના ઓટાળા ગામ પાસે આવેલ ગોકુલ કારખાના સામેથી તેઓનું બાઈક લઈને તેનો ભાઈ ભવાનભાઈ પસાર થઈ રહ્યો હતો ત્યારે તેના બાઈકને ઇકો ગાડીના ચાલકે હડફેટ લીધું હતું જેથી અકસ્માતનો બનાવ બન્યો હતો અને તે બનાવમાં ફરિયાદીના ભાઈને પગમાં ફ્રેક્ચર અને માથામાં ઇજા થવાથી ટાંકા આવ્યા હતા અને શરીરે પણ ઇજાઓ થયેલ છે આ ઉપરાંત સાહેદ બલભદ્રસિંહ કિરીટસિંહ જાડેજાના બાઈક નંબર જીજે 10 સીએસ 2941 ને પણ હડફેટે લેતા તેઓને પણ ઇજા થઈ હતી જેથી ઈજા પામેલા બંને વ્યક્તિઓને સારવાર માટે હોસ્પિટલે લઈ ગયા હતા અને ત્યારબાદ હાલમાં ઈજાગ્રસ્ત યુવાનના ભાઈએ નોંધાવેલ ફરિયાદ આધારે પોલીસે ગુનો નોંધીને ઇકો ગાડીને ચાલકને પકડવા માટે તજવીજ શરૂ કરેલ છે