સાવધાન: ટંકારાના ગ્રામ્ય વિસ્તારમાં ઇન્સ્ટાગ્રામથી સંપર્કમાં આવેલ શખ્સે કર્યું સગીરાનું અપહરણ

ટંકારાના ગ્રામ્ય વિસ્તારમાં રહેતા પરિવારની દીકરીને લલચાવી ફોસલાવીને તેનું અપહરણ કરવામાં આવ્યું છે જેથી હાલમાં ભોગ બનેલ સગીરાની માતાએ ટંકારા તાલુકા પોલીસ સ્ટેશન ખાતે ઇન્સ્ટાગ્રામમાં સૂરજ ચૌધરીના નામથી આઈડી ધરાવતા શખ્સની સામે ફરિયાદ નોંધાવતા પોલીસે ગુનો નોંધી આરોપીને પકડવા માટે અને સગીરાને શોધવા માટે તજવીજ શરૂ કરી છે

સોશિયલ મીડિયાના વધતા ક્રેઝની વચ્ચે ઘણી વખત કલ્પના પણ ન કરી હોય તેવી ઘટનાઓ સામે આવતી હોય છે અગાઉ અનેક વખત મોરબી જીલ્લામાં ઇન્સ્ટાગ્રામમાં સ્ટોરી મુકવા બાબતે બોલાચાલી, માથાકૂટો, મારામારી, અપહરણ, દુષ્કર્મ અને ફરિયાદ સુધીની ઘટનાઓ બની ચૂકી છે દરમ્યાન હાલમાં ટંકારા પોલીસ સ્ટેશનથી જાણવા મળતી વિગત પ્રમાણે ટંકારા તાલુકાના ગ્રામ્ય વિસ્તારમાં રહેતા પરિવારની સગીર વયની દીકરીને લલચાવી ફોસલાવીને તેનું અપહરણ કરવામાં આવ્યું છે જેથી કરીને હાલમાં ભોગ બનેલ સગીરાની માતાએ ઇન્સ્ટાગ્રામ આઈડી સુરજ ચૌધરી વાળા શખ્સની સામે ટંકારા તાલુકા પોલીસ સ્ટેશન ખાતે ફરિયાદ નોંધાવતા પોલીસે આઈપીસી કલમ ૩૬૩ અને ૩૬૬ મુજબ ગુનો નોંધીને આગળની રાબેતા મુજબની તપાસ શરૂ કરી હોવાનું જાણવા મળ્યું છે