મોરબી નજીક અગાઉ પકડાયેલ પેટકોક ચોરીના ગુનામાં એલસીબીની ટીમે વધુ બે આરોપીની કરી ધરપકડ: મુખ્ય સૂત્રધારો હજુ પોલીસ પકડથી દૂર

મોરબી એલસીબીની ટીમ દ્વારા ગત જાન્યુઆરી માહિનામાં જુના સાદુળકા ગામ તરફ જવાના રસ્તા ઉપર આવેલ એબીસી મિનરલની બાજુમાં આવેલ પ્લોટમાં રેડ કરીને પેટકોક ચોરીનો પર્દાફાશ કરવામાં આવ્યો હતો જે તે સમયે ઈમ્પોર્ટ કોલસો, હલકી ગુણવત્તાનો કોલસો અને વાહન વિગેરે મળીને 1.09 કરોડથી વધુનો મુદામાલ કબજે કર્યો હતો જે ગુનામાં વધુ બે આરોપીને પકડીને કોર્ટમાં રજૂ કરીને જેલ હવાલે કરવામાં આવેલ છે અને આ ગુનામાં હજુ પણ મુખ્ય સૂત્રધારને પોલીસ પકડથી દૂર છે. તેને પકડવા માટેની તજવીજ ચાલી રહી છે.

મોરબીના જુના સાદુળકા ગામ તરફ જવાના રસ્તા ઉપર આવેલ સ્વામિનારાયણ ગુરુકુળની સામે એબીસી મિનરલની બાજુમાં આવેલા નવઘણભાઈ બાલાસરા તથા નિકુંજભાઈ રાજપરાના કબજા ભોગવટાવાળા પ્લોટમાં એલસીબીની ટીમે ગત જાન્યુઆરી માહિનામાં રેડ કરી હતી ત્યારે ઈમ્પોર્ટેડ કોલસો એટલે કે પેટકોકની ગાડીઓના ડ્રાઇવર સાથે સંપર્ક કરીને પેટકોકની ચોરી કરીને વાહનમાં હલકી ગુણવત્તાનો કોલસો મિક્સ કરીને કૌભાંડ કરવામાં આવતું હોવાનું સામે આવ્યું હતું જેથી ત્યારે પોલીસે સ્થળ ઉપરથી 188 ટન ઈમ્પોર્ટેડ કોલસો, મિક્સ કરેલ 100 ટન કોલસો, હલકી ગુણવત્તાનો 70 ટન કોલસો, એક ટ્રક, બે ટ્રેક્ટર લોડર, એક હિટાચી મશીન, એક બાઈક, પાંચ મોબાઇલ ફોન સહિત કુલ મળીને 1.09 કરોડથી વધુનો મુદામાલ કબ્જે કર્યો હતો. અને મોરબી તાલુકા પોલીસ સ્ટેશન ખાતે નવઘણભાઈ જસાભાઈ બાલાસરા અને નિકુંજભાઈ રાજપરા સહિત કુલ મળીને 10 શખ્સોની સામે ગુનો નોંધવામાં આવેલ હતો. જે ગુનામાં એલસીબીની ટીમે રમેશ મનસિંગ વસુનિયા (30) અને રાકેશ સાવલાભાઈ વસુનિયા (22) રહે. બંને દૂધીખેડા કલ્યાણપુર તાલુકો કાળીદેવી એમપી વાળાની ધરપકડ કરી હતી અને તે બંને આરોપીઓને મોરબીની કોર્ટમાં રજૂ કરીને જેલ હવાલે કરવામાં આવેલ છે વધુમાં મળતી માહિતી મુજબ આ ગુનામાં મુખ્ય સૂત્રધાર નવઘણભાઈ બાલાસરા તથા નિકુંજભાઈ રાજપરાને પકડવાના હજુ બાકી છે તેને પકડવા માટેની તજવીજ ચાલી રહી છે.