ટંકારાના ધ્રોલીયા ગામેથી ગુમ થયેલ બે સગીર બાળકીઓને શોધીને તેના વાલીને સોંપવામાં આવી

ટંકારા તાલુકાનાં ધ્રોલીયા ગામની સીમમાં વાડીએ રહીને મજૂરી કરતાં ખેડુત પરીવારની બે સગીર દીકરી ગુમ થયેલ હતી જેની ગામના સરપંચે ટંકારા પોલીસને તાત્કાલિક જાણ કરી હતી જેથી પોલીસે જુદીજુદી ટીમો બનાવીને સગીર વયની બે માસુમ દિકરીઓને શોધી કાઢવા માટે કવાયત શરૂ કરી હતી અને બંને બાળકીઓને હેમખેમ શોધી કાઢીને તેના વાલીને સોંપવામાં આવેલ છે.

મોરબીના એસપી મુકેશ પટેલ અને ડીવાયએસપી એસ.એચ.સારડાના માર્ગદર્શન હેઠળ ટંકારા તાલુકા પીઆઇ કે.એમ.છાસિયા અને તેની ટિમ કામ કરી રહી છે તેવામાં નેકનામ આઉટ પોસ્ટના રાજુભાઇ કોપાણીયા અને રાજેશભાઇ કણઝારીયા તથા કિશોરભાઇ દાવા પેટ્રોલીંગમા હતા તે દરમ્યાન ટંકારા તાલુકાના ધ્રોલીયા ગામના સરપંચ બાબૂભાઇ ગમારાએ ફોન કર્યો હતો અને કહ્યું હતું કે, ધ્રોલીયા ગામની સીમમાં આવેલ ગ્રેનેસ્ટા રબરના કારખાનાની સામે દાઉદભાઇની વાડીમા રહેતા ખેતમજુરોની બે નાની દીકરીઓ રીનુ (6) તથા સવીતા (7) વાળી બંને સાંજના આશરે 6 થી 7 વાગ્યાના સુમારે વાડીએ રમત રમતા ઘરેથી દુકાને ચીજવસ્તુઓ લેવા માટે ગઈ હતી અને બંને ઘરે પરત આવેલ નથી જેથી ડીવાયએસપી સમીર સારડાની સુચના મુજબ પીઆઇ કે.એમ.છાસીયા દ્વારા જુદીજુદી ટીમો બનાવીને ધ્રોલીયા ગામના પાટીયાની આજુબાજુના કારખાનાઓમાં તથા વાડી વિસ્તારોમા અને અવાવરૂ જગ્યાએ ચેક કરવામાં આવ્યું હતું દરમ્યાન મોડી રાત્રીના ગુમ થનાર બંને સગીર વયની બાળાઓ ધ્રોલીયા ગામની સીમમા એક મગફળીના ખેતરમાંથી હેમખેમ મળી આવી હતી જેથી બંને બાળાઓને ડીવાયએસપી સમીર સારડા અને પીઆઇ કે.એમ.છાસીયાની હાજરીમાં તેના વાલીને સોંપી દેવામાં આવી હતી.