મોરબીના ઘુંટુ ગામે કપડા સીવડાવવા જવાનું કહીને નીકળેલી યુવતી ગુમ
SHARE
JOIN OUR GROUP
મોરબીના ઘુંટુ ગામે કપડા સીવડાવવા જવાનું કહીને નીકળેલી યુવતી ગુમ
મોરબીના હળવદ રોડ ઉપર આવેલા ઘુંટુ ગામે સોસાયટી વિસ્તારમાં રહેતા પરિવારની યુવતી ઘરેથી કપડા સીવવા માટે આપવા જાવ છું તેમ કહીને નીકળ્યા બાદ ગુમ થઈ ગઈ હોય તેની તપાસ કરવામાં આવી હતી છતાં પત્તો ન લાગતા અંતે તાલુકા પોલીસમાં જાણ કરવામાં આવેલ છે.
મોરબી તાલુકા પોલીસ સુત્રોમાંથી મળતી માહિતી પ્રમાણે હાલમાં પોલીસ સ્ટેશન ખાતે કાનજીભાઈ પીતાંબરભાઈ રાઠોડ (54) રહે. રામપાર્ક સોસાયટી ઘુંટુ તા.જી.મોરબી એ જાહેર કર્યું હતું કે, તેમની પુત્રી ગૌરીબેન કાનજીભાઈ રાઠોડ (ઉમર 25) ગત તા.19 ના બપોરે બે વાગ્યે ઘરેથી કપડા સીવડાવવા આપવા માટે જાવ છું.તેમ કહીને ઘરેથી નીકળ્યા બાદ તેણી ઘરે પરત આવેલ ન હોય ઘરમળે તપાસ કરવામાં આવી હતી છતાં તેણીનો પતો લાગ્યો ન હતો.જેથી હાલ પોલીસમાં જાણ કરવામાં આવતા સ્ટાફના એ.એમ.ગરિયા દ્વારા ગુમ થયેલ યુવતીની શોધખોળ શરૂ કરવામાં આવેલ છે.
વાહન અકસ્માતમાં ઈજા
ધાંગધ્રા પાસે આવેલા દેવ ચરાડી ગામના મોહનભાઈ સુરેશભાઈ ખટાણા નામના 22 વર્ષના યુવાનને ધાંગધ્રા પાસે આવેલ ધોરી ગામ નજીક બાઇક સ્લીપ થવાના બનાવમાં સારવાર માટે મોરબી લાવવામાં આવ્યો હતો. જ્યારે કચ્છના કટારીયા ગામ પાસે બાઈક સ્લીપ થઈ જવાના અકસ્માત બનાવમાં ઇજા પામેલ અફસાનાબેન સતારભાઈ રાઉમા (25) રહે.જુના કટારીયા પડલશાપીર વાસ તા.ભચાઉ ભુજ (કચ્છ) ને સારવારમાં મોરબી લાવવામાં આવ્યા હતા.તેમજ માળીયા મીંયાણાના અંજીયાસર ગામ નજીક હોટલ પાસે બાઈક સ્લીપ થવાના અકસ્માત બનાવમાં રવિકુમાર ધર્મવીરસિંહ (36) રહે.હરીપરને અત્રેની ઓમ ઓર્થોપેડિક હોસ્પિટલે સારવાર માટે લાવવામાં આવ્યો હતો.
હળવદ અકસ્માત
હળવદ ખાતે રહેતા પ્રભુભાઈ નાથાભાઈ રબારી નામના 64 વર્ષના વૃદ્ધ મોટરસાયકલમાં જતા હતા ત્યારે હળવદની સરા ચોકડી પાસે વાહન સ્લીપ થવાના અકસ્માત બનાવમાં ઇજા પામેલ હાલતમાં અત્રે સારવાર માટે લાવવામાં આવ્યા હતા.જ્યારે ઘુંટુ પાસે આવેલ રામકો રામનગરી વિસ્તારમાં રહેતા ગણેશભાઈ સોમાભાઈ કોળી નામનો 41 વર્ષનો યુવાન વાંકાનેરના ઢુવા ખાતે પતરાના સેડ ઉપર કામ કરતો હતો તે વખતે ઊંચાઈએથી નીચે પડી જતા ઇજા પામેલ હાલતમાં મોરબી લાવવામાં આવ્યો હતો.તેમજ વાંકાનેરના રાજગઢ ગામના કુંવરબેન કાળુભાઈ દંતેશરીયા નામના 72 વર્ષના વૃદ્ધા મોટરસાયકલમાં બેસીને જતા હતા ત્યારે ગામમાં આવેલા મંદિર પાસે વાહન સ્લીપ થવાના બનાવમાં ઈજા પામેલ હાલતમાં સારવાર માટે મોરબી લવાયા હતા.જ્યારે હળવદના પંચમુખી ઢોરા વિસ્તારમાં રહેતા જયાબેન બચુભાઈ મોરી નામના 70 વર્ષના વૃદ્ધાને હળવદની મહર્ષિ ટાઉનશીપના ગેટ પાસે બાઈક સ્લીપ થવાના બનાવમાં ઇજા પામેલ હાલતમાં મોરબી લાવવામાં આવ્યા હતા
